У Ваўкавыскім раёне з'явіліся атрады народнага апалчэння
Чамусьці ў пасце Мінабароны пра апалчэнне шмат міліцэйскай формы / Мінабароны
Атрады сфарміраваны ў двух сельскіх выканаўчых камітэтах Ваўкавыскага раёна.
Яны "выконваюць задачы па забеспячэнні грамадскага парадку ў ходзе комплекснай праверкі баявой гатоўнасці Узброеных сіл, а таксама забяспечваюць бяспеку руху вайсковых калон", распавядае Мінабароны.
Колькі гэтых людзей і ці ёсць у іх нейкая пастаянная задача, Мінабароны не кажа.
Ідэя народнага апалчэння з'явілася ў Лукашэнкі. З яго тлумачэнняў дакладна не зразумела, навошта яно трэба:
— Хай людзі вучацца валодаць зброяй, у гэтым няма нічога дрэннага. Як раз кожная сям'я зможа свой дом, пасёлак, вёску абараніць. Гэта зыходзіць з досведу расійска-ўкраінскага канфлікту і ад зямлі.
Падобна, што Лукашэнка марыць стварыць нешта накшталт украінскай тэрытарыяльнай абароны. Значыць, людзі павінны рыхтавацца абараняцца ад знешніх сіл. Пакуль Мінабароны піша пра "грамадскі парадак", гэта значыць сачыць у Ваўкавыскім раёне будуць за сваімі.
