У Ваўкавыску знішчана месца памяці жаўнераў Арміі Краёвай
У Ваўкавыску знішчана магіла жаўнераў Арміі Краёвай. Пра гэта ў фэйсбуку паведамляе прадстаўнік Саюза палякаў у Беларусі Марэк Занеўскі.
"Чарговае польскае месца памяці зруйнавана ў Беларусі", — напісаў Занеўскі.
За сёння гэта ўжо другая навіна аб зруйнаванні месцаў памяці палякаў у Беларусі. Раніцай СМІ паведамілі аб знікненні могілак вайскоўцаў Арміі Краёвай ля вёскі Качычы Карэліцкага раёна.
На мінулым тыдні стала вядома, што бульдозер зраўняў з зямлёй могілкі жаўнераў Арміі Краёвай у вёсцы Мікулішкі Гродзенскай вобласці. Гэтае месца наведаў часовы павераныў справах Польшчы ў Беларусі Марцін Вайцяхоўскі, які ўсклаў там кветкі. Пасля гэтага яго выклікалі ў МЗС, дзе заявілі, што афіцыйна там не зарэгістравана ваенных пахаванняў.
Польскі МЗС лічыць знішчэнні польскіх месцаў памяці у Беларусі мэтанакіраванай акцыяй рэжыму Лукашэнкі "з мэтай далейшага пагаршэння ўзаемаадносінаў паміж Польшчай і Беларуссю".
