У Скандынавіі беларускіх студэнтаў навучаць ствараць парламент?

Беларускія студэнты могуць паехаць вучыцца актыўнаму студэнцкаму жыццю і ўплыву на адміністрацыю ўніверсітэта ў Скандынавіі. Такую думку на сустрэчы з Грамадскім студэнцкім саветам агучвае міністр адукацыі Міхаіл Жураўкоў. Менавіта ўдзельнікаў гэтага савета і прапануецца адправіць набірацца досведу.

На думку міністра прадстаўнікі Грамадскага студэнцкага савета могуць пераймаць досвед еўрапейскіх краін. У прыватнасці, Міхаіл Жураўкоў адзначае якасць працы грамадскіх саветаў у Скандынавіі, перадае сайт Мінадукацыі.

Глядзім, што ж можа даць беларускім студэнтам досвед гэтых паўночных краін.

Студэнцкі парламент з лібераламі, сацыялістамі і кансерватарамі

Ва ўніверсітэце ў Осла, як і ў іншых універсітэтах Нарвегіі студэнты абіраюць свой парламент. Там жа ёсць партыі — сацыялісты, лібералы, кансерватары. Але балатавацца ў парламент можа кожны жадаючы, нават замежнік. Выбары ўсеагульныя, з тыднем агітацыі і электронным галасаваннем. Замежнікі таксама могуць абірацца і галасаваць.

“Усе студэнты галасуюць у электронным выглядзе. Партыі, якія ёсць у парламенце, падобныя да тых, што існуюць у краіне. Яны ж рыхтуюць свае перадвыбарныя праграмы, — расказвае ў мінулым студэнтка ўніверсітэта ў Осла Дар’я Шут. — Студэнты ў праграмах могуць прапанаваць, напрыклад, змяніць вучэбныя планы”.

Універсітэцкі парламент будуе інтэрнат і выдзяляе грошы на святы

Але вучэбныя планы — не адзіная кампетэнцыя нарвежскага студэнцкага парламента. Апроч іншага, яны могуць заблакаваць рашэнне адміністрацыі аб закрыцці навучальнага курса, паставіць ліхтары каля інтэрнатаў, выдзеліць грошы на свята для замежных студэнтаў.

“Я быў на паседжанні ва ўніверсітэце Тромсэ. Закрывалі магістарскую праграму па антрапалогіі. Студэнты звярнуліся да студэнцкага парламента і праграму не зачынілі, — апісвае Аляксандр Луцэвіч, старшыня Брацтва арганізатараў студэнцкага самакіравання. — звярнуўся афрыканскі студэнцкі саюз, папрасіў грошы на святкаванне — 15 тысяч крон (45 мільёнаў рублёў), у выніку далі 30 мільёнаў, калі на беларускія грошы. Паднялі пытанне, чаго не хапае, пастанавілі будаваць інтэрнат”.

На тым жа паседжанні парламент вырашыў паставіць ліхтары, бо ў студгарадку цёмна, ды разгледзелі спрэчку наконт электрычнасці двух студэнтаў: адзін карыстаўся разеткай іншага.

Фота: nordicblog.ru