У сеціва выцяклі ваенныя дакументы ЗША. Амерыканскія чыноўнікі падазраюць Расію
![Будынак Пентагона / Reuters](/sites/default/files/styles/gallery_main/public/2023-08/%D0%B3%D0%BB%D0%B0%D0%B2%D0%BD%D0%B0%D1%8F_118.jpg.webp?itok=y84ORL0L)
Будынак Пентагона / Reuters
У сеціве з'явіліся сакрэтныя вайсковыя дакументы ЗША, піша The New York Times. Сярод іншага ў сліве частковы здымак вайны ва Украіне месячнай даўнасці.
Першапачатковая партыя дакументаў, распаўсюджаная ў тым ліку ў Twitter і Telegram, датаваная 1 сакавіка і мае грыфы "Сакрэтна" і "Цалкам сакрэтна". Пазней у сацыяльных сетках з'явілася яшчэ адна партыя, у якой падрабязна апісваліся сакрэты нацыянальнай бяспекі ЗША, якія тычацца Украіны, Блізкага Усходу і Кітая.
За гэтым, верагодна, стаіць Расія ці прарасійскія элементы, паведамілі агенцтву Reuters тры амерыканскія чыноўнікі. Дакументы, відаць, былі змененыя, каб паменшыць колькасць ахвяр, панесеных расійскімі войскамі, заявілі афіцыйныя асобы ЗША. Яны размаўлялі з журналістамі на ўмовах ананімнасці і адмовіліся падрабязна абмяркоўваць дакументы.
Міністэрства юстыцыі ЗША заявіла, што звязалася з Міністэрствам абароны і пачало расследаванне ўцечкі.
— Нам вядома пра паведамленні ў сацыяльных сетках, і Міністэрства абароны вывучае гэтае пытанне, — заявіла афіцыйная прадстаўніца Пентагона Сабрына Сінгх.
Прадстаўнік ЦРУ заявіў, што агенцтву таксама вядома пра гэтыя паведамленні, і яно вывучае прэтэнзіі.
У адным са злітых дакументаў гаворыцца, што з моманту ўварвання Расіі ва Украіну 24 лютага 2022 года было забіта ад 16 000 да 17 500 расійскіх вайскоўцаў. Злучаныя Штаты лічаць, што рэальная лічба нашмат вышэйшая і складае каля 200 000 забітых і параненых расіян, заявілі афіцыйныя асобы.
Дарадца кіраўніка Офіса Уладзіміра Зяленскага Міхаіл Падаляк напісаў у Twitter, што дакументы ў зліве — падробка. Ён лічыць, што гэта кампанія Крамля па зрыву ўкраінскага контрнаступлення.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.