Вы тут

У Петрыкаўскім раёне невядомы абрабаваў банк

Следчы на месцы злачынства / Прэс-служба СК

Удзень 29 сакавіка невядомы абрабаваў аддзялене банка ў вёсцы Капцэвічы Петрыкаўскага раёна Гомельшчыны, паведамляе прэс-служба Следчага камітэта.

У абед жанчына-аператар выйшла з працоўнага памяшкання. У гэты час у банк уварваўся невядомы мужчына ў балаклаве і з прадметам, падобным на пісталет. Ён стукнуў жанчыну, звязаў ёй рукі і ногі скотчам, забраў ключ і забраў грошы з сейфа. Паводле папярэдніх звестак здабычай нападніка сталі 3005 беларускіх рублёў і 1301 долар ЗША.

Разбойны напад трапіў у аб'ектыў відэакамеры і быў заўважаны службай бяспекі банка. Служба бяспекі адразу ж паведаміла пра злачынства ў міліцыю. На месца здарэння выбыла следча-аператыўная група. Следчыя сабралі шэраг прадметаў, якія маюць істотнае значэнне для раскрыцця і расследавання злачынства, дапыталі пацярпелую, вывучылі запіс камеры відэаназірання.

Па прыкметах, якія апісала супрацоўніца банка, затрымалі 46-гадовага ўраджэнца Мазырскага раёна. Пры сабе мужчына меў грошы і прадмет, падобны да пісталета.

Следчы камітэт пачаў крымінальную справу за разбой. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.