У Маскве затрыманы ўдзельнік пратэстаў з Гомеля
Супрацоўнік расійскай паліцыі / ТАСС
У Маскве затрыманы беларус Міхаіл Зубкоў, які знаходзіцца ў вышуку за ўдзел у маршы ў Гомелі і "гвалт над АМАП", паведамляе БелаПАН са спасылкай на сваякоў затрыманага.
Мужчына быў спынены раніцай у пятніцу для праверкі пашпарта ў маскоўскім метро. Як аказалася, Зубкоў знаходзіцца ў вышуку — паліцыя даставіла яго ў аддзяленне.
У верасні мінулага года Зубкоў удзельнічаў у маршы ў Гомелі, яго затрымаў АМАП. Мужчына правёў 15 сутак у ІЧУ. Больш да яго прэтэнзій з боку міліцыі не было, запэўніваюць сваякі. Міхаіл з'ехаў на працу ў Маскву.
У жніўні да жонкі і маці Міхаіла прыйшла міліцыя — былі ператрусы, шукалі і самога мужчыну. Потым жонку выклікалі ў СК. Следчая паказала ёй фатаграфіі з маршу і патлумачыла, што яе муж падышоў да супрацоўніка АМАП "бліжэй, чым належыць", і што ў Міхаіла на фота быў чырвоны твар.
"Гэта значыць "ён гатовы быў кінуцца на супрацоўніка АМАП", — расказалі сваякі.
Папярэдне на Зубкова завялі крымінальную справу за гвалт над супрацоўнікам міліцыі.
