У Малдове па запыце Беларусі затрымалі дэпутата ўкраінскага парламента
У Малдове затрымалі дэпутата Вярхоўнай Рады Украіны Яўгена Якавенку. Як піша newsmaker.md, адбылося гэта на адным з памежных кантрольна-прапускных пунктаў. Падчас праверкі дакументаў высветлілася, што ён знаходзіцца ў міжнародным вышуку па лініі Інтэрпала. Якавенку змясцілі ў следчы ізалятар.
Кіраўнік малдоўскага бюро Інтэрпала Віярэл Цэнцю заявіў, што ўкраінскі дэпутат аб'яўлены ў вышук Беларуссю. Улады РБ абвінавачваюць яго ў "хабарніцтве" і "карупцыі", і спадзяюцца на экстрадыцыю.
Reuters адзначае, што спробы ўзяць каментар на тэму затрымання Якавенкі ў афіцыйных асобаў Украіны і Беларусі выніку не далі.
УНІАН нагадвае, што Яўген Якавенка быў абраны дэпутатам Вярхоўнай Рады ў 2019-м па адной з акруг у Данецкай вобласці. Ён заставаўся пазафракцыйным дэпутатам.
