У Казахстане затрымалі былога міністра ўнутраных спраў
Ерлан Тургумбаеў / inform.kz
У Казахстане затрымалі былога міністра ўнутраных спраў. Ерлана Тургумбаева падазраюць у "перавышэнні ўлады, якое пацягнула цяжкія наступствы", паведамляе vlast.kz.
Генпракуратура Казахстана адзначае, што затрыманне былога сілавіка звязана з расследаваннем справы аб падзеях студзеня 2022 года. Тады ў краіне адбываліся масавыя пратэсты і сутыкненні з паліцыяй, загінулі сотні людзей. Расследуецца і незабеспячэнне правапарадку і бяспекі ў перыяд студзеньскіх падзей, і факты прымянення катаванняў да грамадзян.
Тургумбаева дапытвалі ў сакавіку 2024-га, але не было вядома, ці ён сведка, ці падазраваны.
Ерлан Тургумбаеў працаваў у праваахоўных органах з 1984 года. Міністрам унутраных спраў ён стаў у 2019-м і тройчы перапрызначаўся. У лютым 2022 года быў вызвалены ад пасады міністра ўнутраных спраў і прызначаны дарадцам прэзідэнта Казахстана. Праз паўгода Тургумбаева вызвалілі і ад гэтай пасады.
