У Італіі затрымалі былога кіраўніка "Пінскдрэва" Ларана Арыніча (відэа)

Як заявіў намеснік генпракурора Аляксей Стук, паведамленне пра затрыманне было атрыманае па лініі Інтэрпола. Ларан Арыніч знаходзіцца пад вартай у Італіі.

"Калі ў італьянскага боку не знойдзецца абставінаў, якія перашкаджаюць яго выдачы, я спадзяюся, што мы яго атрымаем", — цытуе словы Стука "Интерфакс-Запад".

Нагадаем, былы кіраўнік "Пінскдрэва" знаходзіўся ў вышуку ад жніўня 2011 года. Генпракуратура распачала супраць яго крымінальную справу па факце пажару на фабрыцы "Пінскдрэў ДСП", дзе загінулі 14 чалавек, два дзясяткі працаўнікоў атрымалі траўмы. У жніўні мінулага года Арыніча знайшлі на тэрыторыі Польшчы. Ён знаходзіўся пад хатнім арыштам. Адказу на запыт аб яго экстрадыцыі з Польшчы ў Беларусь не прыйшло.

ДАВЕДКА Еўрарадыё:

25 кастрычніка 2010 года на фабрыцы “Пінскдрэў ДСП” адбыўся выбух. Загінулі 14 чалавек, а яшчэ 21 рабочы атрымаў траўмы рознай ступені цяжкасці. Была распачатая крымінальная справа. У сакавіку 2012-га калегія па крымінальных справах Брэсцкага абласнога суда абвесціла прысуд па справе выбуху. Вінаватымі прызналі былога галоўнага інжынера холдынга, галоўнага інжынера і былога дырэктара "Пінскдрэў-ДСП". Інжынер холдынга прыгавораны да чатырох гадоў пазбаўлення волі, галоўны інжынер да трох гадоў, былы дырэктар гэтага прадпрыемства — да чатырох гадоў пазбаўлення волі. Крымінальная справа ў адносінах былога гендырэктара "Пінскдрэву" Ларана Арыніча была вылучана ў асобную вытворчасць.

Спачатку супрацоўнікі праваахоўных органаў паведамлялі, што Ларан Арыніч з іх ведама знаходзіцца на лячэнні ў Польшчы. Аднак у жніўні 2011 года ён быў абвешчаны ў вышук. Тады заяўлялася, што калі ён сам не вернецца на радзіму, то пытанне аб яго выдачы будзе вырашацца на ўзроўні Генеральных пракуратур Беларусі і Польшчы.

У верасні 2011-га экс-кіраўніка “Пінскдрэва” пазбавілі звання ганаровага грамадзяніна Пінску. Такое рашэнне прыняў Пінскі гарсавет. Падставай дэпутаты назвалі тое, што Арыніч збег ад следства і абвешчаны ў вышук. Гэтым ён здыскрэдытаваў сваю асобу і ганаровае званне.

Сваякі загінулых рабочых лічаць, што бізнэсоўцу свядома дазволілі збегчы за мяжу. Таму яны напісалі ў Адміністрацыю прэзыдэнта, Генпракуратуру, МУС, КДБ і Камітэт дзяржкантролю калектыўны ліст, у якім патрабавалі пакараць былога дырэктара.