У Ісландыі адбылося вывяржэнне вулкана. Жыхароў бліжэйшага горада эвакуіравалі
Вывяржэнне адбылося сёння раніцай / www.facebook.com/Almannavarnir
Раніцай 14 студзеня на паўвостраве Рэйк'янес на паўднёвым захадзе Ісландыі адбылося вывяржэнне вулкана, паведамляе нацыянальная тэлерадыёвяшчальная кампанія краіны RÚV.
Вывяржэнню папярэднічалі каля 200 падземных штуршкоў, яны былі зафіксаваны ў ноч на 14 студзеня. З-за сейсмічнай актыўнасці стала зразумела, што вывяржэнне непазбежнае, і ўлады загадзя эвакуіравалі жыхароў горада Грындавік, размешчанага побач з вулканам. У горадзе адключылі электрычнасць.
Пасля вывяржэння лава цячэ ў бок Грындавіка. Паводле апошніх звестак, зараз яна знаходзіцца за 400-500 метраў ад дамоў на паўночнай ускраіне горада.
У Грындавіку жыве каля 3500 чалавек, ён знаходзіцца за 70 кіламетраў ад сталіцы Ісландыі Рэйк'явіка. У лістападзе 2023 года жыхароў Грындавіка ўжо эвакуіравалі з-за пагрозы вывяржэння.
Усяго ў Ісландыі 32 актыўныя вулканы. У 2010 годзе ў краіне адбылося вывяржэнне вулкана Эяф'ятлаёкудль. У паветра ўзняўся слуп попелу, з-за якога па ўсёй Еўропе былі адменены тысячы авіярэйсаў.
