У Гомелі затрымалі былую журналістку Ларысу Шчыракову

Ларыса Шчыракова / svaboda.org

Увечары 6 снежня ў Гомелі затрымалі былую журналістку Ларысу Шчыракову, перадае Радыё "Свабода". Яе сына-падлетка Святаслава забралі ў прытулак — "Сацыяльна-педагагічны цэнтр" у Гомельскім раёне.

Крыніца "Свабоды" кажа, што прычыны і абставіны затрымання невядомыя: "Ніякай ні актыўнай, ні журналісцкай дзейнасцю Ларыса апошнія гады не займалася".

Да 2021 года Шчыракова супрацоўнічала з шэрагам незалежных СМІ. Яна здымала дакументальныя фільмы, вяла свой праект ушанавання памяці рэпрэсаваных "Забітыя і забытыя". Раней узначальвала краязнаўчую арганізацыю "Талака", ліквідаваную ўладамі.

У апошнія месяцы жанчына займалася этнафотасэтамі: фатаграфавала людзей у народных беларускіх строях і ў адпаведных месцах. Сёлета Шчыракова паступіла вучыцца на факультэт псіхалогіі. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.