У Чавускім раёне старшыня райвыканкама выратаваў чалавека на пажары
![У Чавускім раёне старшыня райвыканкама выратаваў чалавека на пажары](/sites/default/files/styles/gallery_main/public/2023-08/20170124_164912_284690_800x600_mc.jpg.webp?itok=tN3e-TO1)
У Чавускім раёне старшыня мясцовага райвыканкама Сяргей Драздоўскі (на здымку знізу) выратаваў чалавека на пажары. Здарэнне адбылося ў другой палове дня ў аўторак, 24 студзеня. У вёсцы Галузы гарэў жылы дом і два хлявы. Драздоўскі, які знаходзіўся ў суседняй вёсцы, пабачыў дым, паведаміў пра здарэнне і паехаў на месца. Туды ж прыехаў участковы міліцыянер Аляксандр Барсукоў, які быў у іншай вёсцы і паспяшаўся на дапамогу.
Як інфармуе прэс-служба МНС Магілёўскай вобласці, старшыня райвыканкама і міліцыянер яшчэ да прыбыцця ратавальнікаў вывелі з дома, які гарэў, гаспадара (самастойна выйсці ён не мог). Мужчына не пацярпеў, аднак яго шпіталізавалі з сардэчнай гіпертэнзіяй 3-й ступені. Агонь паспеў знішчыць дом і дзве гаспадарчыя пабудовы. Мяркуецца, што прычынай узгарання стала парушэнне правілаў эксплуатацыі печаў, цеплагенерыруючых агрэгатаў і прыладаў.