У "БСБ Банка" забіраюць ліцэнзію па асобных аперацыях з фізічнымі асобамі

Праўленне Нацбанка вырашыла адклiкаць у ЗАТ "БСБ Банк" ліцэнзію на ажыццяўленне банкаўскай дзейнасці па наступных банкаўскіх аперацыях:

прыцягненне грашовых сродкаў фізічных асоб (акрамя індывідуальных прадпрымальнікаў) на рахункі і ва ўклады (дэпазіты);

адкрыццё і вядзенне банкаўскіх рахункаў фізічных асоб (акрамя індывідуальных прадпрымальнікаў);

выдача каштоўных папер, якія пацвярджаюць прыцягненне грашовых сродкаў фізічных асоб (акрамя індывідуальных прадпрымальнікаў) ва ўклады (дэпазіты), і размяшчэнне іх на рахункі;

выпуск у абарачэнне (эмісія) банкаўскіх плацежных картак фізічных асоб (акрамя індывідуальных прадпрымальнікаў);

давернае кіраванне грашовымі сродкамі па дамове давернага кіравання грашовымі сродкамі фізічных асоб (акрамя індывідуальных прадпрымальнікаў).

Як паведамляе прэс-служба Нацбанка, такое рашэнне было прынятае ў сувязі з парушэннямі і недахопамі, выяўленымі падчас праверкі банка. Рашэнне набывае моц з 26 чэрвеня 2017 года.

Згодна з Банкаўскім кодэксам, банк мусіць кампенсаваць укладчыкам і іншым крэдыторам страты, панесеныя імі ў сувязі з немагчымасцю выканання банкам сваіх абавязанняў.

Да 26 чэрвеня "БСБ Банк" павінен выконваць абавязанні па заключаных дамовах па вяртанні грошай фізічным асобам да 26 чэрвеня. З 26 чэрвеня гэтыя абавязкі пераходзяць на дзяржаўную ўстанову "Агенцтва па гарантаванай кампенсацыі банкаўскіх укладаў (дэпазітаў) фізічных асоб".

Банкам-павераным, які будзе ажыццяўляць прыём заяваў аб выплаце кампенсацыі банкаўскіх укладаў (дэпазітаў), прыцягнутых ЗАТ "БСБ Банк", і выплату гэтай кампенсацыі, вызначаны ААТ "Банк Масква-Мінск".

Дарэчы, ЗАТ "БСБ Банк" па памеры актываў на 1 чэрвеня 2017 года займае 17-е месца ў банкаўскай сістэме Беларусі. Доля актываў банка ў банкаўскай сістэме складае 0,4%.