У Брэсцкай вобласці затрымалі менеджара аднаго з буйных прадпрыемстваў

Супрацоўнікі ГУБАЗіК МУС затрымалі антыкрызіснага кіраўніка аднаго з горадаўтваральных прадпрыемстваў Брэсцкай вобласці. Пра якое прадпрыемства ідзе гаворка, у МУС не расказалі. Адзначылі толькі, што летась завод выставілі на продаж. З'явіўся інвестар. Антыкрызісны кіраўнік прапанаваў знізіць кошт лота на 50%, але папрасіў ўзнагароджанне за паслугі. Памер "адкату" вызначыў у 1,25 мільёна рублёў. Інвестар пагадзіўся. У выніку была арганізаваная цэлая серыя безвыніковых таргоў, пакуль кошт аб'екта не быў зніжаны да патрэбнага ўзроўню.

Антыкрызіснага кіраўніка затрымалі ў Мінску ў адным з гатэляў "пры атрыманні часткі хабару ў 50 тысяч рублёў", кажуць у МУС. На прадпрыемстве мужчына працаваў з 2016 года. Яму 62 гады. Цяпер ён арыштаваны, яму пагражае да 15 гадоў пазбаўлення волі.