У Беларусі яшчэ 7 чалавек прызналі палітвязнямі
![У Беларусі больш за 1300 палітвязняў](/sites/default/files/styles/gallery_main/public/2023-09/kratyrb.jpg.webp?itok=EHTkGAqt)
У Беларусі больш за 1300 палітвязняў / dpa
У Беларусі яшчэ 7 чалавек прызналі палітвязнямі. Гэта — Антон Станкевіч, Аляксей Кісялёў, Наталля Жыгар, Наталля Давыдуліна, Віталь Лескавец, Ягор Волкаў і Ігар Нажэеў. Беларускія праваабаронцы лічаць іх справы палітычна матываванымі і патрабуюць вызвалення.
Пяць чалавек з новых палітвязняў змешчаны пад варту: Станкевіч — па абвінавачванні ў "фінансаванні экстрэмісцкай дзейнасці" за ахвяраванні пратэсным ініцыятывам, Кісялёў — па абвінавачванні ў "садзейнічанні экстрэмісцкай дзейнасці" і "праходжанні навучання ці іншай падрыхтоўкі для ўдзелу ў экстрэмісцкай дзейнасці" — за ўваходжанне ў абвешчаную ў РБ "экстрэмісцкім фармаваннем" ініцыятыву дыстанцыйнай падрыхтоўкі прафесіяналаў, Жыгар — па абвінавачванні ў "садзейнічанні экстрэмісцкай дзейнасці" за падтрымку палітвязняў, Давыдуліна — па абвінавачванні ў "садзейнічанні экстрэмісцкай дзейнасці", Лескавец — па абвінавачванні ў "фінансаванні экстрэмісцкай дзейнасці" і "удзелу грамадзян у вайсковых канфліктах" за ахвяраванні пратэсным ініцыятывам і беларускім добраахвотнікам у складзе Узброеных сіл Украіны.
Волкаў асуджаны да 3 гадоў пазбаўлення волі па абвінавачванні ва "удзеле ў групавых дзеяннях, якія груба парушаюць грамадскі парадак" і "фінансаванні экстрэмісцкай дзейнасці" за ўдзел у мірных пратэстах і за ахвяраванні пратэсным ініцыятывам, а Нажэеў — па абвінавачванні ва "удзеле ў групавых дзеяннях, якія груба парушаюць грамадскі парадак" і "садзейнічанні экстрэмісцкай дзейнасці".
У Беларусі больш за 1300 палітвязняў, прызнаных праваабаронцамі. Насамрэч іх значна больш.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.