У Беларусі будуць абязлічваць асабістыя даныя людзей, якім аказваюць меддапамогу
У Беларусі будуць абязлічваць асабістыя даныя людзей, якім аказваюць меддапамогу. Міністэрства аховы здароўя сваёй пастановай (№ 64 ад 28 траўня 2021-га) зацвердзіла адпаведную інструкцыю. Яна набывае сілу з 23 ліпеня.
Абязлічванне асабістых даных пацыентаў будзе рабіцца "ў рамках эксплуатацыі цэнтралізаванай інфармацыйнай сістэмы аховы здароўя". І цяпер "здзяйсняецца распрацоўка цэнтральнай праграмнай платформы". Гэтая "інтэграваная інфармацыйная сістэма" і мусіць забяспечыць "захоўванне і апрацоўку медыцынскай інфармацыі". У яе ўключаны базы даных, у тым ліку адзіны электронны архіў медінфармацыі пра пацыентаў.
"Асноўны элемент сістэмы — элетронная медыцынская карта пацыента", — піша Мінаховы здароўя.
Якія даныя будуць абязлічвацца? Прозвішча і імя, даныя аб серыі і нумары дакументаў, ідэнтыфікацыйны нумар, нумары дома, корпуса і кватэры месца жыхарства, фотавыявы, даныя пра род дзейнасці, а таксама інфармацыя аб выніках патолагаанатамічнага ўскрыцця для ўстанаўлення прычыны смерці.
Увод у дзейнасць сістэмы запланаваны на травень 2023 года.
