Трох прадавачак на Лідчыне забілі дзеля 40 мільёнаў рублёў
Зламыснік рыхтаваўся да кожнага злачынства, плануючы нават шляхі магчымага адыходу.
Следчы камітэт завяршыў следства па крымінальнай справе 28-гадовага ўраджэнца Брэстчыны, якога вінавацяць у забойстве трох жанчын за 40 мільёнаў рублёў. Крымінальная справа перададзеная пракурору для накіравання ў суд.
Як паведамляе БелаПАН, спярша мужчына забіў дзвюх прадавачак у Лідзе. Іх целы са шматлікімі пашкоджаннямі знайшлі на працоўным месцы 15 верасня 2013 года. Праз год такое ж забойства адбылося ў вёсцы Сялец Лідскага раёна. Тады цела жанчыны знайшлі ў лесапаласе каля крамы, у якой яна працавала.
Следчыя кажуць, што доўга не маглі злавіць зламысніка, бо ён старанна рыхтаваўся да кожнага злачынства: планаваў не толькі спосаб злачынства, але і шляхі магчымага адыходу.
Расследуючы злачынствы, следчыя дапыталі сотні сведак, правялі некалькі дзясяткаў найскладанейшых экспертызаў.
Мужчыну затрымалі, і з яго ўдзелам на месцы забойстваў былі высветленыя акалічнасці забойстваў. Паведамляецца, што забойствы мужчына ўчыніў з карыслівых матываў.
Яго абвінавацілі па шэрагу артыкулаў Крымінальнага кодэксу, у тым ліку ў забойстве трох асоб, учыненым з асаблівай жорсткасцю з карыслівых меркаванняў.
Дарэчы, мужчыну можа пагражаць смяротная кара.
Фота — rus.delfi.ee