Сына Шушкевіча ў турме заразілі COVID-19, 86-гадовы палітык — на самаізаляцыі

Сын першага кіраўніка незалежнай Беларусі Станіслава Шушкевіча заразіўся каранавіруснай інфекцыяй, калі адбываў 10-сутачны арышт у жодзінскім ізалятары. Жонка палітыка Ірына заразілася ад сына, калі паехала забіраць яго пасля адседкі. 

Цяпер 86-гадовы Шушкевіч на жорсткай самаізаляцыі ад родных, бо ён у "групе рызыкі" па COVID-19. Ён расказаў Еўрарадыё, што застаўся ў кватэры адзін і не выходзіць з яе.

— Сын у турме падчапіў каранавірус, заразіў маці. Цяпер яны ў іншай кватэры, а я ў гэтай — на рэжыме самаізаляцыі. Сын ужо, здаецца, перахварэў, а жонка хварэе.

Аналізы паказалі, што і ў адным, і ў другім выпадку быў COVID-19. Жонка тры дні адчувала сябе вельмі дрэнна. Сын перанёс параўнальна лёгка.

У камеры, дзе сядзеў сын Шушкевіча, хварэла дзесяць чалавек

— Сын расказваў, што ў Жодзіне ставіліся па-людску, на Акрэсціна — па-бандыцку.

Станіслаў Шушкевіч пакуль што не мае намеру выходзіць у людзі: рызыка заразіцца высокая.

— Калі я падчаплю каранавірус, то мне канец. Таму пакуль што планую быць на жорсткай самаізаляцыі. Калі пачнецца вакцынацыя, то выйду, а так нават выходзіць не хачу. У мяне акрамя пагрозы каранавіруса кардыялагічных хапае і іншых праблем, мне ўсё ж такі 86 гадоў.

9 снежня ад наступстваў каранавіруса памёр былы беларускі прэм'ер Вячаслаў Кебіч. Яму было 84 гады. А раней, летам, у першую хвалю COVID-19, памерла сястра Станіслава Шушкевіча.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.