Смаргонца, які паўмесяца таму знік у Маскве, знайшлі ў Арлоўскай вобласці РФ
![Абвестка пра пошук Аляксандра Новака](/sites/default/files/styles/gallery_main/public/2024-08/novak-2608.png.webp?itok=pSned80M)
Абвестка пра пошук Аляксандра Новака / атрад "Анёл"
У горадзе Мцэнску Арлоўскай вобласці Расіі знайшоўся 35-гадовы жыхар Смаргоні Аляксандр Новак, які знік 12 жніўня ў Маскве на Беларускім вакзале, піша kraj.by.
Мужчыну знайшлі за 310 кіламетраў на поўдзень ад Масквы. Яго вяртаннем дадому займаюцца расійскія валанцёры.
У пошукава-выратавальным атрадзе "Анёл" кажуць, што ў Аляксандра Новака ў Смаргоні жыве мама, а ў Латвіі — сястра. "У нядзелю, 25 жніўня, сястра Новака звязалася з намі і паведаміла, што яе брат знойдзены ў расійскім горадзе Мцэнску", — кажа прэс-сакратарка "Анёла" Юлія Коўган.
Паводле яе, у "Анёле" не ведаюць, як мужчына апынуўся ў Мцэнску і ці звязаная гісторыя яго знікнення з працоўным рабствам. Але вядома, што вяртаннем Новака ў Беларусь займаюцца валанцёры расійскай арганізацыі "Альтэрнатыва" — яна акурат змагаецца з усімі формамі сучаснага рабствам, у тым ліку з працоўным рабствам.
"Сястра Аляксандра Новака паведаміла: валанцёры "Альтэрнатывы" сказалі, што пасадзяць яе брата ў цягнік да Мінска на тым жа Беларускім вакзале, на якім ён знік 12 жніўня. Мы прапанавалі сястры сустрэць Аляксандра ў Мінску і суправадзіць да Смаргоні. Яна пакуль адказала: "Я не ведаю", — расказвае Юлія Коўган.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.