Што нельга рабіць у Беларусі — гайд для турыстаў

Былі прэцэдэнты затрыманняў за любую крытыку Лукашэнкі і яго рашэнняў, знешняй палітыкі Беларусі і нават за знойдзеныя пратэрмінаваныя тавары ў крамах. З наступнымі відэа ад міліцыі на фоне сцяны кшталту таго, што адбываецца ў кадыраўскай Чачні.

3. Выкарыстоўваць у вопратцы або аксесуарах бел-чырвона-белае спалучэнне

У Беларусі могуць затрымаць нават за бел-чырвона-белыя штаны ад Adidas. Або за белую блузку і чырвоную спадніцу. Або за красоўкі ў такой каляровай гаме.

Сілавікі цалкам могуць прыняць чалавека ў такім аўтфіце за апазіцыянера. Турыст, не турыст — разбірацца будуць пасля.

Да падзей 2020-га такога не было, але цяпер у лік забарон у Беларусі трапляе бел-чырвона-белае спалучэнне ў чым заўгодна. Праблемы могуць быць і праз іншае спалучэнне колераў, але пра гэта ніжэй.

4. Лаяцца матам

За маты міліцыя пры ахвоце таксама можа затрымаць — за "парушэнне грамадскага парадку". Гэтак і здарылася з блогерам Глебасам (хоць не толькі маты сталі для яго праблемай). 

Так што калі хочаце вылаяцца, азірніцеся і пераканайцеся, што побач няма сілавікоў. І камер. І наогул нікога. А лепш не лайцеся.

5. Збірацца вялікімі кампаніямі

Калі захочаце сабрацца вялікай кампаніяй, будзьце асцярожныя. Ніхто не гарантуе, што беларускія сілавікі не ўспрымуць гэта як "несанкцыянаванае масавае мерапрыемства". Нават калі вы проста ў складзе 20 чалавек хацелі пасядзець на беразе Свіслачы і паслухаць музыку.

Не заўсёды бяспечнай будзе нават вечарынка ў прыватным катэджы ці кватэры — як мінімум таму, што па начах у Беларусі нельга шумець, і міліцыя можа прыехаць нават з гэтай нагоды.

6. Хадзіць на "мерапрыемствы для дарослых"

Сілавікі ў Беларусі змагаюцца не толькі з апазіцыяй, але і з сексуальнай свабодай. Былі выпадкі затрыманняў на прыватнай свінгер-вечарыне ў катэджы, а ў канцы 2023-га міліцыя наляцела на закрытую Hentai Party у адным з клубаў. Некаторым наведвальнікам потым далі ад 3 да 15 сутак арышту.

Зазіраюць сілавікі ў Беларусі і на паўпадпольныя ЛГБТ-вечарынкі. Закон аб забароне "ЛГБТ-прапаганды" ў Беларусі пакуль не прынялі, але гэта не замінае сілавікам прэсаваць супольнасць ужо шмат гадоў.

7. Мець або выкарыстоўваць усё, што можа быць расцэненае як наркотык

У Беларусі жорсткае антынаркатычнае заканадаўства, і за "траўку" можна трапіць у турму вельмі надоўга. Відавочна, лепш пазбягаць любога кантакту з наркотыкамі — і каб не было праблем з законам, і каб зберагчы здароўе.

Але спіс рэчываў, якія могуць прыраўняць да наркатычных, у Беларусі шырэйшы.

Праблемы могуць з'явіцца, калі ў вас ёсць, напрыклад, антыдэпрэсант "Бупрапіён" або сродак ад СДУГ з метылфінедатам. Наяўнасць рэцэпта замежнага лекара не ўратуе ад праблем. Тое ж самае, напрыклад, з еўрапейскім "Тэрафлю", у ім ёсць псеўдаэфедрын, які таксама забаронены ў Беларусі.

Каб не парушыць ніводнай з забаронаў на правоз розных рэчываў у Беларусь, лепш загадзя перагледзьце аптэчку. Ці ўвогуле пакіньце яе дома. А то раптам што.

8. Мець "няправільныя" татуіроўкі

Некаторыя татуіроўкі таксама пад забаронай у Беларусі, і за іх актыўна пераследуюць. І не толькі за тату са свастыкай, але і за ACAB, "1312" і за куды больш бяскрыўдныя выявы.

Праўда, "экстрэмісцкай" або "нацысцкай" татуіроўкамі беларускія сілавікі могуць палічыць не толькі такія, але і скандынаўскія руны або міфалагічныя сюжэты. Ва ўсякім разе, ужо дзясяткі беларусаў затрымалі за самыя розныя тату, пасля чаго іх прымушалі выпраўляць выявы.

9. Візуальна дэманстраваць падтрымку Украіне

У Беларусі затрымлівалі нават за жоўта-сінюю стужку ў валасах. Любая праява салідарнасці з Украінай у сучаснай Беларусі фактычна пад забаронай. Некаторым затрыманым ставіліся ў віну нават пасты з дзяржаўным гербам і сцягам Украіны. Жоўта-сіняе спалучэнне аксесуараў або іншых прадметаў таксама можа выклікаць пытанні з боку сілавікоў.