Рыгора Кастусёва перавялі ў калонію "Воўчыя норы"

Лідара Партыі БНФ Рыгора Кастусёва перавялі ў калонію "Воўчыя норы". Пра гэта піша "Народная воля" са спасылкай на зяця Кастусёва Дзмітрыя Антончыка.

Выданне нагадвае, што папраўчая калонія №22 у Івацэвічах вядомая даволі жорсткім стаўленнем да зняволеных. У гэтай калоніі цяпер знаходзіцца каля паўсотні палітвязьняў, у тым ліку і сябры Партыі БНФ Уладзімір Малахоўскі і Павел Юхневіч.

Кастусёва асудзілі на 10 гадоў калоніі ўзмоцненага рэжыму. Яго абвінавацілі ў змове з мэтай захопу ўлады неканстытуцыйным шляхам. Сваю віну ён не прызнаў. У судзе сказаў, што ўдзельнічаў у зум-канферэнцыях з іншымі фігурантамі гэтай крымінальнай справы — палітолагам Аляксандрам Фядутам і юрыстам Юрыем Зянковічам — толькі для таго, каб знайсці выхад з санкцыйнага ціску на краіну.

У зняволенні ў Кастусёва абвастрыліся праблемы са здароўем. У яго выявілі анкалагічнае захворванне.