Ярмошына: Удзел у дэбатах — "поўная добраахвотнасць"

Паводле словаў старшыні Цэнтрвыбаркама Лідзіі Ярмошынай, удзел у дэбатах — рэч добраахвотная:

"Калі кіраўнік дзяржавы не пажадае ўдзельнічаць у дэбатах — ён у іх удзельнічаць не будзе. Тады астатнія кандыдаты будуць дэбатаваць адзін з адным".

У выбарчым штабе Аляксандра Лукашэнкі не ведаюць, ці пойдзе ён на тэледэбаты разам з іншымі кандыдатамі. Больш за тое, не могуць сказаць, хто валодае такой інфармацыяй. Чальцы ініцыятыўнай групы параілі журналісту Еўрарадыё звярнуцца з гэтым пытаннем у Цэнтравыбаркам.

Супрацоўнік штабу: "Я не ў стане адказаць упэўнена, бо не валодаю сітуацыяй".

У прэс-службе арганізацыі "Белая Русь" таксама нічога ня ведаюць пра ўдзел прэзідэнта ў дэбатах. Прэс-сакратар "Белай Русі" Юрый Міронаў адзначыў, што яго таксама цікавіць гэтае пытанне.

"Не ведаю, не магу нават блізка адказаць. Мне самому было б гэта цікава".

Некалькі месяцаў таму тэледэбаты адбываліся падчас прэзідэнцкай кампаніі ў Польшчы. Кіраўнік усходняй праграмы Цэнтра міжнародных адносінаў Войтэк Бародзіч распавёў Еўрарадыё, што адмовы ад удзелу ў публічнай палеміцы тады былі часткай палітычнай гульні:

"Браніслаў Камароўскі да апошняга часу адмаўляўся ўдзельнічаць у дэбатах, у якіх не браў удзел Яраслаў Качыньскі. Бо іншыя апаненты яго ніяк не задавальнялі".

Хто з кім будзе дэбатаваць у Беларусі — гэта кандыдаты мусяць вырашыць гэта самі. Калі на кім-небудзь з іх сыдзецца выбар адразу некалькіх прэтэндэнтаў на прэзідэнцкую пасаду — ён сам мусіць вызначыцца, хто яму больш да спадобы.

— Яны вырашаюць гэта самі з сабой, і гэта поўная добраахвотнасць, — распавяла Лідзія Ярмошына.

— Такім чынам, калі, напрыклад, трое кандыдатаў абяруць для дэбатаў чацвертага, ён сам будзе вырашаць, з кім з трох мець справу? — перапыталі мы.

— Так! — адказала старшыня ЦВК.

У Польшчы ўзгадненнем дэбатных параў займаліся штабы кандыдатаў:

"І зыходзілі яны з чыста практычных меркаванняў, — працягвае Войтэк Бародзіч. — Напрыклад, кандыдаты з высокім рэйтынгам не жадалі стартаваць у дэбатах з аўтсайдэрамі палітычнай кампаніі".

На вырашэнне таго, хто з кім і як сустрэнецца на сёлетніх тэледэбатах, у ахвочых да пасады прэзідэнта Беларусі ёсць месяц. Мяркуецца, што запіс і трансляцыя публічных спрэчак адбудзецца ў канцы лістапада — пачатку снежня 2010 года, пасля таго, як скончыцца рэгістрацыя кандыдатаў у прэзідэнты.