Беларускай АЭС можа заняцца Камітэт па нацыянальнай бяспецы Сейма Літвы
Такое меркаванне выказаў старшыня Камітэта па этыцы і працэдурах Сейма Літвы Альгімантас Саламакінас.
На яго думку, якую пераказвае ІА REX, у сітуацыі, якая склалася вакол будаўніцтва беларускай АЭС, павінны разбірацца зусім не эколагі. Нагадаем, што шэраг літоўскіх чыноўнікаў заявілі, што ў 50 кіламетрах ад Вільні могуць пабудаваць "патэнцыйную пагрозу". Менавіта таму, кажа Саламакінас, разбірацца з гэтым павінен Камітэт па нацыянальнай бяспецы літоўскага Сейма.
Разам з тым літоўскі парламентар мяркуе, што не трэба надаваць будаўніцтву беларускай АЭС празмернай ўвагі. Гэта, маўляў, справа беларускай дзяржавы. У той жа час, на думку Саламакінаса, калі будаўніцтва АЭС плануецца ажыццявіць недалёка ад літоўскай мяжы, то Літва павінна атрымліваць усю інфармацыю пра гэты аб'ект.
