У Мінску праспявалі песні Эмі Ўайнхаўс

21/12/2011 - 10:30

Ва Ўніверсітэце культуры і мастацтваў прайшоў незвычайны канцэрт. Незвычайны таму, што падчас яго студэнты кафедры “Мастацтва эстрады” выконвалі толькі песні Эмі Ўайнхаўс. Так атрымалася, кажа выкладчык кафедры – вядомая джазавая спявачка Яўгенія Лятун, што творы Эмі Ўайнхаўс адпавядаюць навучальнай праграме студэнтаў.

Яўгенія Лятун: “У нас абавязковы рэпертуар змяняецца штосеместр. І па патрабаванні дадзенага курса падышла Эмі Ўайнхаўс. Прынесла адна студэнтка, прынесла іншая. У выніку я прапанавала ўсім праспяваць яе песні і зрабіць тэматычны канцэрт, тым больш, што яе ўжо, на жаль, няма”.

www.mp3

Над, падавалася б, простымі песнямі Ўайнхаўс, студэнтам давялося папрацаваць не на жарт, дзеліцца сваімі назіраннямі Яўгенія Лятун.

Яўгенія Лятун: “А ў якасці школы гэта ўвогуле, я лічу, выдатны вучэбны дапаможнік. Мае ўсе: “Ой, Эмі Ўайнхаўс! Клас! Будзем спяваць! А пачалі слухаць і застагналі, маўляў, там цяжка і складана. На слых нібыта просценькія песенькі, а пачалі здымаць – давялося і павучыцца, і папрацаваць, і патлумачыць і па тэксце, і па фразе. Так, добрая школа”.

nat.mp3

У канцэрце бралі ўдзел студэнты розных курсаў і спецыяльнасцяў. У выніку на сцэне з’явіўся студэнцкі бэнд, які такім чынам здаваў чарговы іспыт ці залік.

“Гэта было прыдумана гадоў 15 таму – такая трыадзіная сістэма, калі спецынструмент ці вакал дэманструюцца ў суправаджэнні інструментальнага ансамбля, - тлумачыць выкладчык ансамбля і аранжыроўкі Ўладзімір Бялоў. - То бок, сама дысцыпліна ансамбля, спецынструмент і імправізацыя аб’ядноўваюцца. І калі ўсе розныя курсы, і іх немагчыма падагнаць пад адзін агульны назоўнік, таму мы ладзім іспыт ці залік у выглядзе такога канцэрта”.

На думку выкладчыцы майстэрства акцёра і сцэнічнай мовы, дацэнта Дзіны Георгіеўны Тыцюк, канцэрт вялікіх адкрыццяў не прынёс, аднак парадаваў відавочным развіццём студэнтаў.

Дзіна Тыцюк: “Тыя студэнты, якія займаюцца добра ў мяне, і тут праявілі сябе. Але заўсёды прыемна прыйсці і ўпэўніцца ў тым, што яны не безнадзейныя, што яны рухаюцца, растуць, развіваюцца, робяцца больш свабоднымі – для мяне гэта галоўная ўмова сцэнічнага майстэрства. Яны маюць стасункі з гледачом ужо не толькі праз песню, але і праз слова. Таму што толькі для гэтага мы выходзім – ні фанцікі ды банцікі прадэманстраваць, ні туфелькі і сукенкі, а ўмець па сродках нейкага матэрыялу – песеннага ці моунага размаўляць з гледачом і сказаць яму нешта сваё”.

Размаўляць з гледачом студэнтам падчас выніковага канцэрту, прысвечанага заканчэнню семестра і творчасці Эмі Ўайнхаўс, сапраўды было пра што – тэксты песень Эмі вельмі змястоўныя, перабіваючы адзін аднаго распавядаюць Уладзімір Бялоў і Яўгенія Лятун.

Уладзімір Бялоў: “Манера Ўайнхаўс сапраўды кардынальна адрозніваецца ад сучаснай эмцівішнай манеры. Па сутнасці гэта непрычасанае гучанне, усё вельмі спрошчана”. “І, нарэшце, тэксты нармальныя – можна нешта ў сабе нарадзіць і выразіць . Гэта ж не “I Love You Baby” ці “Together Always”, - дадае Яўгенія.

Уладзімір Бялоў і Яўгенія Лятун