Пяскоў пракаментаваў словы Лукашэнкі пра варварства Расіі
Хоць Аляксандр Лукашэнка і выступае з рэзкімі заявамі на адрас Расіі, афіцыйны Мінск застаецца саюзнікам Масквы. Пра гэта заявіў прэс-сакратар Крамля Дзмітрый Пяскоў, адказваючы на пытанні журналістаў.
"Давайце не забываць, што ў нас саюзная дзяржава", — цытуе РБК словы Пяскова. Ён дадаў, што "аб'ём адносінаў паміж краінамі такі вялікі, што не можа ажыццяўляцца без шурпатасцяў". Для "ўрэгулявання такіх шурпатасцяў" і сустракаюцца кіраўнікі Беларусі і Расіі, патлумачыў ён.
Як паведамлялася раней, сустрэча Аляксандра Лукашэнкі і Уладзіміра Пуціна адбудзецца сёння ў Сочы.
Пра "варварскія паводзіны" Расіі Лукашэнка казаў 10 жніўня. Ён заявіў, што расіяне паводзяць сябе так быццам Беларусь у іх у васалах.
