Пуцін прыляцеў у Мінск на закрыццё ІІ Еўрапейскіх гульняў

Прэзідэнт Расіі Уладзімір Пуцін прыляцеў у Мінск. Як перадае ТАСС, ён прыбыў у Беларусь на запрашэнне Аляксандра Лукашэнкі і наведае цырымоні закрыцця ІІ Еўрапейскіх гульняў.

Самалёт Пуціна прыляцеў з Брацка —  там расійскі кіраўнік пасля вяртання з саміту G20 у Японіі праводзіў нараду па сітуацыі з паводкамі ў Іркуцкай вобласці.

Два тыдні таму Лукашэнка і Пуцін правялі сустрэчу падчас саміту Шанхайскай арганізацыі супрацоўніцтва ў Бішкеку. Тады прэс-служба Крамля заявіла, што кіраўнікі краінаў маюць намер правесці двухбаковую сустрэчу ў найбліжэйшы час.

На адкрыцці ІІ Еўрапейскіх гульняў Расію прадстаўляў прэм’ер-міністр Дзмітрый Мядзведзеў.

Цырымонія закрыцця адбудзецца сёння ўвечары.