Прызёрка Алімпійскіх гульняў з'ехала з Беларусі ў Польшчу
![Наталля Лешчык / t.me/racyja/](/sites/default/files/styles/gallery_main/public/2023-08/333333.jpg.webp?itok=B5JZj4AD)
Наталля Лешчык / t.me/racyja/
Сярэбраная прызёрка Алімпіяды-2012 па мастацкай гімнастыцы, заслужаная майстарка спорту Наталля Лешчык з'ехала з Беларусі ў Польшчу. Яна будзе трэніраваць дзяцей у Беластоку. 26 красавіка беларуску афіцыйна прадставілі гарадскія ўлады, паведамляе @mostmediaio.
Лешчык падпісвала ліст свабодных спартсменаў і выказвалася пра сітуацыю ў Беларусі пасля прэзідэнцкіх выбараў 2020-га. Яна асудзіла і расійскую агрэсію ва Украіне.
"Пасля пратэстаў у нас у Беларусі вельмі трывожная сітуацыя, вельмі шмат людзей саджаюць у турму, — кажа Наталля Лешчык. — Я адкрыта выказвала пазіцыю супраць дыктатуры і вайны. Была верагоднасць, што па мяне прыйдуць і пасадзяць. Увесь час была ў трывожным стане і таму вымушаная была з'язджаць з краіны".
У Польшчы беларуска жыве з зімы 2022 года. Спачатку гэта быў Уроцлаў, а пасля прапанавалі працу і жыллё ў Беластоку.
"Я б хацела сказаць дзякуй Польшчы за гасціннасць, прытулак і магчымасць пачувацца ў бяспецы, — кажа Лешчык. — Я вельмі рада папрацаваць у Беластоку з дзецьмі. Спадзяюся, наша праца будзе прадуктыўнай".
Беларуска будзе рыхтаваць будучых польскіх чэмпіёнаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.