Праваабаронцы: За акцыю "Стоп-падатак" у мінчука забралі BMW

Як інфармуе сайт spring96.org, 20 снежня Прыгараў выехаў на праспект Незалежнасці з лістоўкай "Хопіць абдзіраць!" на шкле аўтамабіля. Да таго ж ён уключыў песню "Не быць скотам" у выніканні гурта "Ляпис Трубецкой".

Паводле расповеду кіроўцы, ён ехаў на машыне ад плошчы Перамогі ў бок плошчы Незалежнасці. Каля Палаца Рэспублікі на праспекце яго спынілі супрацоўнікі ДАІ і накіравалі на бліжэйшую стаянку. Там яго аштрафавалі за тое, што ён сігналіў на 65 тысяч рублёў. Пасля гэтага Дзмітрыю Прыгараву паведамілі, што яго аўтамабіль павязуць на стаянку Цэнтральнага РУУС — нібыта, узніклі пытанні з нумарным знакам кузава. Там яго сфатаграфавалі і апячаталі, забралі ключы, а праз некалькі дзён паведамілі, што машыну забралі на месяц — будуць праводзіць экспертызу. Адзін з праваахоўнікаў сказаў, што "калі б сядзеў дома — не было б праблемаў".

Днямі малады чалавек накіраваў скаргу на дзеянні супрацоўнікаў міліцыі начальніку Цэнтральнага РУУС.
 

Нагадаем, аўтамабілісты пратэстуюць супраць увядзення ў 2014 годзе ў Беларусі дзяржаўных пошлін на допуск аўтамабіляў да ўдзелу ў дарожным руху.

У Мінску прайшла акцыя пратэсту аўтамабілістаў (фота, відэа)