Праваабаронцы прызналі палітвязнем бацьку палітвязня Мікіты Залатарова
Міхаіл Лапуноў
Міхаіла Лапунова ўжо чацвёрты раз асудзілі на 15 сутак.
Праваабаронцы прызналі палітвязнем Міхаіла Лапунова, бацьку палітзняволенага Мікіты Залатарова.
Як распавядала Еўрарадыё, Лапунова затрымалі яшчэ ў жніўні. Яму ўжо тройчы прысуджалі па 15 сутак, абвінаваціўшы ў распаўсюдзе "экстрэмісцкіх" матэрыялаў (ч. 1 арт. 19.11 КаАП).
22 верасня мужчыну прысудзілі чацвёрты адміністрацыйны тэрмін і зноў адправілі за краты.
Яго сын Мікіта — адзін з самых маладых затрыманых падчас пратэстаў 2020 года. На той момант 16-гадовага Мікіту, хворага на эпілепсію, абвінавацілі ажно па трох артыкулах Крымінальнага кодэкса і асудзілі на 5 гадоў выхаваўчай калоніі. Пазней на хлопца пачалі яшчэ адну крымінальную справу — абвінавацілі ў тым, што ён нібыта напаў на супрацоўніка СІЗА і пагражаў яго родным. Агульны тэрмін пакарання для Мікіты склаў 4 гады і 6 месяцаў выхаваўчай калоніі.
