Прарасійскі актывіст Агафонаў выйшаў на волю

На волю выйшаў прарасійскі актывіст Арцём Агафонаў. Пра гэта ён напісаў у сваім тэлеграм-канале.

"Я ў парадку. Жывы, здаровы і ў нядрэнным настроі, наколькі гэта ў маёй сітуацыі наогул магчыма. Падрабязнасці пазней, цяпер хочацца адаспацца", — паведаміў ён.

Пра затрыманне Агафонава 29 жніўня паведаміла яго паплечніца, прарасійская актывістка з Віцебска Эльвіра Мірсалімава. Яна заявіла, што затрымалі яго "па даносе змагара, заўкраінца-русафоба" Дзмітрыя Карняенкі.

Сам Карняенка апублікаваў у Фэйсбуку адказ магілёўскай міліцыі на свой электронны зварот. Міліцыя правяла праверку і знайшла на старонцы Агафонава ў Фэйсбуку "прыкметы адміністрацыйнага правапарушэння": ён, маўляў, распаўсюджваў "інфармацыйную прадукцыю, уключаную ў рэспубліканскі спіс экстрэмісцкіх матэрыялаў".

Паводле інфармацыі Агафонава, за такое ж правапарушэнне чакае суда яшчэ адзін віцебскі прарасійскі актывіст Аляксандр Андрэйкаў.

Раней некалькі адміністрацыйных судоў адбылося і над Эльвірай Мірсалімавай.