Польшча будуе электронны бар'ер на беларускай мяжы

Паблізу польска-беларускай мяжы на тэрыторыі Владаўскага павета Люблінскага ваяводства вядуцца работы па будаўніцтве электроннага бар'ера на рацэ Буг, піша reform.news са спасылкай на памежную службу Польшчы.

Зараз вядзецца расчыстка тэрыторыі ад дрэў і кустоў, ўсталёўваюцца слупы для камер і мантуюцца сістэмы электразабеспячэння.

Працягласць электроннага бар'ера на гэтым участку складзе каля 172 км. Ён будзе ўключаць у сябе каля 1800 слупоў з камерамі, каля 4500 камер дзённага і цеплавізійнага назірання, а таксама спецыяльныя датчыкі для выяўлення розных фізічных асаблівасцяў аб'ектаў. Прадугледжана пракладка каля 200 км сілавых і столькі ж перадаючых кабеляў, а таксама закладка каля 10 тэлетэхнічных кантэйнераў.

"Электронны бар'ер спраектаваны такім чынам, што радыус яго дзеяння ахоплівае ўсю працягласць мяжы з Беларуссю на планаванай да аховы памежнай ракі, без наяўнасці "мёртвых зон", з улікам наяўнага рэльефу, стаячых і цякучых паверхневых вод і расліннасці. Гэта дазволіць памежнікам атрымаць інструмент для аховы дзяржаўнай мяжы, які выяўляе інцыдэнты пры перасячэнні мяжы і забяспечвае кругласутачнае назіранне за памежнай паласой", — гаворыцца ў паведамленні.

Узвесці бар'ер плануюць на працягу года. На праект выдзелена 279 мільёнаў злотых (больш за 70 млн долараў).