Пасол Швейцарыі зноў наведаў у беларускай турме Наталлю Хершэ
Наталля Хершэ падчас суда / spring96.org
Пасол Швейцарыі ў Мінску Клод Альтэрмат 25 студзеня наведаў у турме Наталлю Хершэ, ураджэнку Беларусі, а цяпер грамадзянку Швейцарыі.
7 снежня суд Савецкага раёна Мінска прызнаў яе вінаватай у супраціве супрацоўніку міліцыі і асудзіў на 2,5 гады калоніі агульнага рэжыму. Падставай для крымінальнай справы сталі падзеі 19 верасня, калі Хершэ падчас жаночай акцыі сарвала балаклаву з амапаўца і падрапала яму пры гэтым твар.
"З улікам няпростых умоў справы ў яе ідуць добра. Наталля зноў дзякуе за магутную падтрымку і пастаяннае увагу да яе", — напісаў дыпламат на сваёй старонцы ў Twitter па выніках сустрэчы з Хершэ ў беларускай турме.
Today visiting Natallia Hersche in jail in downtown Minsk. Ich traf heute erneut unsere Mitbürgerin Natallia H., der es den nicht einfachen Umständen entsprechend gut geht. Again, Natallia thanks all for the strong support and the continued attention she is getting. pic.twitter.com/db6kX0AK7V
— Claude Altermatt (@SwissAmbBelarus) January 25, 2021
Раней Клод Альтерматт размаўляў з Хершэ 5 студзеня. Агенцтва БелаПАН не выключае, што цяперашняя сустрэча можа быць звязаная з галадоўкай Наталлі. Раней СМІ паведамлялі, што яна аб'яўляла галадоўку з-за таго, што да яе перасталі даходзіць лісты. Але пасля таго, як яе перавялі ў камеру з лепшымі ўмовамі і перадалі некалькі дзесяткаў лістоў, Наталля Хершэ спыніла галадоўку.
Аднак, паводле звестак БелаПАН, галадоўка працягваецца. Агенцтва спасылаецца на словы дачкі арыштаванай заснавальніцы "Прэс-клуба" Юліі Слуцкай Аляксандры. Напярэдадні адвакат Юліі Слуцкай сустракаўся са сваёй падабароннай і даведаўся, што да іх у камеру перавялі Наталлю Хершэ.
"Яна (Хершэ — Еўрарадыё) галадае зараз, таму ўсім у камеры прыходзіцца несалодка: па нескольку раз у дзень праводзяць шмоны, выганяюць усіх у карцэр, усё абшукваюць, вытрасаюць, перагортваюць", — распавяла Аляксандра Слуцкая.
Беларускія праваабаронцы прызналі Херше палітзняволенай.
22 снежня сітуацыю з Наталляй Хершэ абмяркоўвалі падчас тэлефоннай размовы міністры замежных спраў Беларусі Уладзімір Макей і Швейцарыі Іньяцыа Касіс. Касіс па выніках размовы напісаў, што пасольства сочыць за гэтай справай і што "наша суграмадзянка павінна быць вызвалена".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
