"Пашпарт замежніка" для беларуса ў Літве можна будзе зрабіць за пяць дзён
![Эвеліна Гудзінскайце](/sites/default/files/styles/gallery_main/public/2023-09/hudzinskajcie-1109.jpg.webp?itok=ZVQ3Pojh)
Эвеліна Гудзінскайце / svaboda.org
У Літве "пашпарт замежніка" для беларуса можна падрыхтаваць за пяць дзён. Пра гэта дырэктарка дэпартамента міграцыі Эвеліна Гудзінскайце расказала ў інтэрв'ю Радыё "Свабода".
Па словах літоўскай чыноўніцы, раней на такі дакумент вялікага попыту не было: "5 чалавек за год бывала, летась іх было 16, не было патрэбы ў такім дакуменце. У Літве цяпер жыве не адна тысяча беларусаў, якія выехалі і не могуць вярнуцца на радзіму. Рана ці позна ў іх скончацца пашпарты, і ім спатрэбіцца іншы дакумент".
Гудзінскайце запэўнівае, што працэс выдачы "пашпарта замежніка" не зойме шмат часу. Аднак кожная заява будзе разглядацца індывідуальна.
"Тэарэтычна, калі ўсе дакументы ў парадку, працэдура падрыхтоўкі пашпарта замежнага грамадзяніна займае 5 дзён. Для гэтага трэба зарэгістравацца на партале міграцыі, прыкласці доказы і тлумачэнні, якія яны маюць і якія кажуць, што гэтыя людзі не могуць вярнуцца ў Беларусь", — кажа дырэктарка міграцыйнай службы Літвы.
У Дэпартаменце па міграцыі давядзецца паказаць арыгіналы ўсіх дакументаў, уключна з тымі, якія сведчаць пра пераслед.
Выдавацца "пашпарт замежніка" будзе на падставе дзейнага дазволу на жыхарства. Атрымаць яго змогуць не толькі ўладальнікі гуманітарных візаў, але і тыя, хто мае працоўны дазвол ці іншы дакумент.
Як распавядала Еўрарадыё, цяпер гэты дакумент мае тэрмін дзеяння адзін год, аднак літоўскія ўлады хочуць павялічыць гэты тэрмін.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.