Пасажыр мінскай таксоўкі абрабаваў свайго спадарожніка
Увечары 29 снежня мінскіх міліцыянтаў выклікалі на вуліцу Ясенніна паведамленнем аб рабунку. Як інфармуе прэс-служба праваахоўнікаў, на месцы яны высветлілі акалічнасці здарэння.
Два мінчукі ехалі на таксоўцы. Даехаўшы да месца прызначэння, адзін з іх перадаў кашалёк 29-гадоваму спадарожніку, каб той расплаціўся. Аднак той дастаў усё з партманета і паклаў сабе ў кішэню. Потым малады чалавек выйшаў з аўтамабіля і стаў нешта хаваць у снег.
Гэта міліцыянтам распавёў 68-гадовы пацярпелы, а таксама кіроўца таксі, які падвозіў мужчын.
Праваахоўнікі хутка затрымалі падазраванага і знайшлі грошы, якія ён схаваў у снезе.
Высветлілася, што мужчына ўжо быў раней судзімы і неаднаразова прыцягваўся да адміністрацыйнай адказнасці. Цяпер яму пагражае суд за рабаванне.
Фота: puper.by
