Паручальнікаў за Граблеўскага і Драздоўскага прымусілі плаціць
![Паручальнікаў за Граблеўскага і Драздоўскага прымусілі плаціць](/sites/default/files/styles/gallery_main/public/2023-08/drazdouski-0611.jpg.webp?itok=o4H21oe8)
Чатырох паручальнікаў за праваабаронцаў Сяргея Драздоўскага і Алега Граблеўскага прымусілі заплаціць. Пасяджэнне правёў 5 лістапада суддзя Партызанскага раёна Мінска Міхаіл Макарэвіч.
Два паручальнікі Драздоўскага павінныя заплаціць па 2900 рублёў (100 базавых велічынь), адзін паручальнік Граблеўскага — 5800 рублёў (200 базавых), другі — 7250 рублёў (250 базавых). Гэтае рашэнне можна абскардзіць цягам 10 дзён.
Як піша праваабарончы сайт "Вясна", суддзя спытаўся ў паручальніцы Граблеўскага, чаму яна вырашыла падпісаць паручальніцтва.
— Таму што Алег — харошы чалавек.
— Вы і цяпер так лічыце?
— Так.
Сяргей Драздоўскі — дырэктар Офіса па правах людзей з інваліднасцю, Алег Граблеўскі — юрыст Офіса. Іх затрымалі 3 лютага 2021 года. Драздоўскі быў пад хатнім арыштам, Граблеўскі — у СІЗА №1.
Праз паўгода, 31 ліпеня, іх вызвалілі пад асабістае паручальніцтва. Паручальнікі ўзялі на сябе пісьмовае абавязанне, што вызваленыя не ўцякуць, не будуць перашкаджаць расследаванню справы і не будуць займацца злачыннай дзейнасцю.
Дарэчы, у публічным доступе няма інфармацыі пра ўцёкі і вышук Драздоўскага і Граблеўскага.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.