Палітвязень Дзмітрый Кулакоў расказаў, як уцёк з "хіміі"
![Сям'я ўжо змагла выехаць да Дзмітрыя Кулакова / nashaniva.com](/sites/default/files/styles/gallery_main/public/2023-08/kulakov_11_08.jpg.webp?itok=yTUsPf7A)
Сям'я ўжо змагла выехаць да Дзмітрыя Кулакова / nashaniva.com
Пераскочыў праз плот і пабег: так апісвае свае ўцёкі з "хіміі" палітвязень Дзмітрый Кулакоў. Падрабязнасці ён расказаў у інтэрв'ю "Нашай Ніве".
У снежні 2020-га Кулакова асудзілі на 3,5 года "хіміі". Кулакова прызналі вінаватым па двух артыкулах КК: "Гвалт альбо пагроза прымянення гвалту ў дачыненні да супрацоўніка органаў унутраных спраў" і "Абраза прадстаўніка ўлады". Гаворка ішла пра паведамленне ў лакальнай групе. Адбываць пакаранне яго накіравалі ў папраўчую ўстанову адкрытага тыпу №49 у Шклове. У чэрвені ён праглынуў кавалак металічнай лыжкі — на знак пратэсту, што яго не пусцілі на спатканне з жонкай. А 19 ліпеня збег.
"Гэта быў як раз першы дзень, як я змяніў працу — перавёўся з грузчыка на слесара на камбікормавым заводзе ў Александрыі. За 15 хвілін да абедзеннага перапынку я сказаў, што трэба пайсці памыцца, бо рукі брудныя", — расказвае Дзмітрый.
Яшчэ ён сказаў, што ў абед хоча падрамаць. Але замест гэтага выкінуў сімку з тэлефона, "акуратна паглядзеў па баках, каб мяне ніхто не бачыў, пераскочыў праз плот і пабег".
Адсутнасць Дзмітрыя заўважылі толькі праз паўтары гадзіны. Паўтара тыдня ён хаваўся ў Беларусі, а 31 ліпеня перайшоў мяжу ў Літву. Ішоў разам з яшчэ адным уцекачом.
"Мы перайшлі мяжу, зайшлі ў найбліжэйшую літоўскую вёску, папрасілі мясцовага жыхара, каб ён выклікаў памежнікаў. Ён яшчэ ўдакладніў, якіх — беларускіх ці літоўскіх. Падумаў, раптам гэта грыбнікі заблукалі. Мы сказалі, што літоўскіх. Прыехалі памежнікі і забралі нас на заставу", — расказвае Кулакоў.
![Политзаключенный Дмитрий Кулаков рассказал, как убежал с "химии"](/sites/default/files/paragraphs/image/granica1108.jpg)
На заставе ён правёў шэсць дзён. Прызнаецца, што быў здзіўлены колькасці мігрантаў з Афрыкі і Ірака. Яму з цяжкасцю знайшлі месца, не было матрацаў.
"Для літоўцаў дзіка — як спаць без матрацаў? Я жартую: хлорку не вылівайце, гімн ранкам не ўключайце — і добра. Мы дапамагалі памежнікам прадукты разгружаць, ложкі рамантаваць, мігрантаў размяшчаць", — расказвае Кулакоў.
Ён падаў прашэнне аб наданні яму статусу бежанца. Сям'я таксама змагла выехаць да яго.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.