Падпалкоўнік, якога судзяць у Барысаве за хабар, цалкам прызнаў сваю віну

Падпалкоўнік, якога судзяць у Барысаве за хабар, цалкам прызнаў сваю віну

У судзе Барысаўскага раёна ідзе працэс над кіраўніком фізпадрыхтоўкі 72-га вучэбнага цэнтра ў Печах. Гвардыі падпалкоўнік Дзмітрый Кіселар абвінавачаны ў хабарніцтве. 

Справа супраць яго была пачатая яшчэ ў 2016 годзе (да скандальнай гісторыі з гібеллю шарагоўца Аляксандра Коржыча), але вядома пра яе стала толькі цяпер. Крымінальная справа налічвае 10 тамоў, сведкамі па ёй праходзяць 33 чалавекі. У ёй фігуруе 20 выпадкаў хабару.

Сам Кіселар знаходзіцца не пад вартай. Ён звольнены з пасады, і з яго ўзятая падпіска аб нявыездзе.  

У суд справа паступіла 2 лютага. З таго часу ўсе сведкі ў судзе ўжо дапытаныя. Сам Кіселар цалкам прызнаў сваю віну.  

14 сакавіка на працэсе быў дапытаны сведка Аляксей Пыцель. Ён распавёў, што іспыты па фізпадрыхтоўцы здаюцца двойчы ў год — увесну і ўвосень. Той, хто не здае фізпадрыхтоўку, пазбаўляецца прэміі — 80 рублёў. 

Увесну 2015 года да яго звярнуліся вайскоўцы Міхалевіч, Сусла і Кавальскі, якія цікавіліся, як можна выправіць нездавальняючыя адзнакі па фізпадрыхтоўцы. Пыцель кажа, што звярнуўся да Кіселара, і той адказаў, што яму павінны прынесці пакет, у якім будуць каньяк, цукеркі, кава і кілбаса.

Міхалевіч і Сусла набылі названыя прадукты і аддалі пакет Пыцелю для перадачы Кіселару. Кавальскі быў на службе і сам купіць прадукты не мог, таму ён даў Пыцелю 250 тысяч недэнамінаваных рублёў, і той набыў каву "Нэскафэ" і каньяк "Белы бусел", а таксама цукеркі і кілбасу. Усе пакеты былі перададзеныя Кіселару праз трэцюю асобу. Пасля гэтага хлопцы атрымалі станоўчыя адзнакі. 

Пракурор запытаўся ў сведкі, ці ведаў ён загадзя, што трэба будзе набываць прадукты Кіселару за добрыя адзнакі. Пыцель адказаў, што не ведаў пра гэта. 

Працяг судовага працэсу прызначаны на 19 сакавіка.

Апошнія навіны

Галоўнае

Выбар рэдакцыі