"Нікому яна не перашкаджае": смярдзючую прыбіральню ў Глыбокім так і не абнавілі
"Сучасная" прыбіральня на аўтастанцыі ў Глыбокім / Еўрарадыё
У горадзе Глыбокае Віцебскай вобласці мясцовыя ўлады ўсё ніяк не могуць пабудаваць грамадскую прыбіральню на аўтастанцыі. Пра замену старой з дзіркамі ў падлозе жыхары Глыбокага просяць з 2019 года. "Там нават немагчыма памыць рукі. А чалавек, які наведвае прыбіральню, сутыкаецца з моцным непрыемным пахам ад выграбных ям, асабліва ў летні час", — пісалі гараджане ў петыцыі да "Віцебскаблаўтатранса" і Глыбоцкага райвыканкама.
Жыхар Глыбокага даслаў Еўрарадыё фота прыбіральні ў яе цяперашнім стане. У сітуацыі па-ранейшаму назіраецца стабільнасць.
— Я падумаў, што перад фота прыбіральні варта сфатаграфаваць будынак суда, — іранічна дадае аўтар фота.
— Туалет на вуліцы па-ранейшаму працуе, — расказвае Еўрарадыё мясцовая жыхарка. — Прыбіральня там страшная, смярдзючая, сцены абшарпаныя і аблезлыя. Рабілі там нейкі рамонт, фарбавалі, але гэта ўсё бескарысна.
Еўрарадыё вырашыла высветліць у мясцовых чыноўнікаў, калі ж на аўтастанцыі пабудуюць нармальную прыбіральню? У аддзеле архітэктуры і будаўніцтва Глыбоцкага райвыканкама нам кажуць, што новую прыбіральню плануюць перанесці з вуліцы ў памяшканне.
— Трошкі там яны ўжо зрабілі прыбіральню ўнутры будынка. Але не ведаю, наколькі гэта ўсё завершана, — адказвае Еўрарадыё Аксана Шавурка, намесніца начальніка аддзела архітэктуры і будаўніцтва Глыбоцкага райвыканкама. — Але тое, што будзе рамонт гэтага будынка да "Дажынак", якія ў нас будуць у 2022 годзе, гэта дакладна.
Пакуль што людзей пускаюць у часовую платную прыбіральню, размешчаную ў будынку аўтастанцыі. Але ці будуць рэканструяваць старую?
— Не вядома, — працягвае чыноўніца. — Цяпер пытанне стаіць у тым, каб усё было ўнутры будынка. Яны ўжо займаліся праектаваннем, і, па-мойму, нават нейкія работы выканалі. Ну а тое, што яна на вуліцы стаіць, — нікому ж яна не перашкаджае.
Зрэшты, і ў 2019 годзе чыноўнікі казалі амаль тое самае: "Праектная дакументацыя ўжо зроблена, грошы будуць". А прыбіральня па-ранейшаму не адрамантаваная, і ці будзе новая да "Дажынак-2022" — таксама пытанне.
