Нават вазелін і воск: што можа падаражэць праз увядзенне ПДВ на лекі

29/12/2020 - 12:17

У краіне з бясплатнай медыцынай лячыцца часта бывае нятанна / Getty Images

У краіне з бясплатнай медыцынай лячыцца часта бывае нятанна / Getty Images

З новай рэдакцыі Падатковага кодэкса знік пункт аб вызваленні ад ПДВ некаторых лекавых сродкаў і медыцынскіх вырабаў. Мінфін супакойвае: пацыенты гэтага не адчуюць. Але калі прыгледзецца да аргументаў ведамства, становіцца зразумела: гаворка ідзе толькі пра пацыентаў стацыянараў.

Пра тых, хто купляе лекі і медыцынскія вырабы (а гэта палачкі, мыліцы, лабараторныя рэагенты) у аптэках, ведамства сціпла прамаўчала. Давядзецца Еўрарадыё расказваць пра магчымыя наступствы таго, што "для лекаў замест вызвалення ад ПДВ будзе дзейнічаць паніжаная стаўка 10%".

Было — 0%, стала — 10%

Самае простае наступства: цэны на шэраг лекаў і медвырабаў могуць вырасці на памер падатку. Вядома, пастаўшчыкі могуць узяць гэтыя выдаткі на сябе. Але з цяжкасцю верыцца, што яны ахвяруюць рэнтабельнасцю сваёй працы.

Такім чынам, павышэнне цэн беларусы адчуюць. Аргумент Мінфіна пра пацыентаў у стацыянарах выклікае іронію і таму, што там лекі ўсе атрымліваюць бясплатна.

Прычым вырастуць цэны не толькі праз падатак: многія імпартныя прэпараты даражэюць праз зніжэнне курса рубля.

Што менавіта можа падаражэць

Пералік прэпаратаў і медыцынскіх вырабаў, якія раней вызваляліся ад падаткаў, зацверджаны ўказам Лукашэнкі. Ён датычыўся тавараў, якія ўвозяцца ў Беларусь. На першы погляд можа здацца, што падаражэюць толькі імпартныя лекі. Але гэта не зусім так.

У Беларусі фармацэўтычныя субстанцыі (гэта значыць фактычна дзейныя рэчывы) не вырабляюцца. У той жа час раней ад падатку вызвалялася ў тым ліку "фармацэўтычная прадукцыя". Пад гэтай катэгорыяй маюцца на ўвазе прэпараты з інсулінам, некаторыя антыбіётыкі, кортыкастэроідныя гармоны, вітаміны і далей па спісе. Тамсама — прэпараты пад маркай "іншыя", што фактычна можа азначаць "усе".

Адмена льгот закране не толькі лекі. Напрыклад, падаткам будуць абкладацца лабараторныя рэагенты (гэта значыць здаць аналізы будзе даражэй), мыліцы і палачкі, стаматалагічныя інструменты і многае іншае. Нават вазелін і воск.