Вы тут

На "лутынг" за адгул. Як бюджэтнікаў зазываюць на праўладны мітынг

Сустрэча ўдзельніцы "Маршу мудрасці" з удзельнікамі праўладнага маршу на плошчы Перамогі ў Мінску 19 кастрычніка 2020 года / Еўрарадыё

Улады рыхтуюць вялікі праўладны мітынг у Мінску ў нядзелю 25 кастрычніка. Традыцыйна касцяк удзельнікаў будуць складаць работнікі бюджэтных арганізацый. Еўрарадыё даведалася, чым спрабуюць завабіць патэнцыйных удзельнікаў чарговага "лутынгу".
 

"Хто не згодны, трэба звальняць"

Аляксандра (імя зменена па просьбе суразмоўніцы) працуе ў адной з школ у райцэнтры.

— Я ў "кола пасвячоных" не ўваходжу, мне дырэктар, мабыць, не давярае, але ўчора падышла вельмі засмучаная настаўніца фізкультуры і расказала, што трапіла ў спіс (у якім 8 чалавек) тых, хто ў нядзелю едзе на мітынг, — расказала настаўніца Еўрарадыё.

Тым, хто ўвайшоў у спіс удзельнікаў мітынгу, абяцаюць па два адгулы.

— На пытанне: “А ці можна адмовіцца?" было сказана: "Не, нельга". Ніякіх канкрэтных пагроз, здаецца, не паступала (ну ці настаўніца не стала мне расказваць), але ў нас дырэктар рашуча настроены і пазіцыя ў яго такая, што тых, хто не згодны з цяперашняй уладай, трэба звальняць. Таму ў нас, я так разумею, ніхто ігнараваць мітынг не будзе.

Суразмоўніца Еўрарадыё мяркуе, што ў спісе ёсць і абыякавыя, і шчырыя прыхільнікі Аляксандра Лукашэнкі. Усяго восем чалавек трапілі ў яго, па яе словах, праз памеры школы — яна невялікая.

Ад школы на мітынг паедуць настаўнікі розных узростаў.

— Гэтай настаўніцы фізкультуры 36. Яшчэ ведаю, што едзе такая ж маладая спецыялістка, як і я. Пра астатніх не ведаю, але вось гэтыя абедзве сядзелі ў нас у камісіі на выбарах, — дадала яна.

Праўладны мітынг ветэранаў сілавых структур у падтрымку Лукашэнкі 19 кастрычніка 2020 года / Еўрарадыё

"Хочаце як ва Украіне?"

Яшчэ адна суразмоўніца Еўрарадыё, Вікторыя, працуе ў дзіцяча-юнацкай спартыўнай школе ў Бярозе.

— Наколькі ведаю, нашу арганізацыю раней не падключалі да гэтага, але учорашняй раніцай мяне паклікала да сябе намесніца дырэктара па гаспадарчай частцы і кажа, маўляў, трэба з'ездзіць у Мінск у нядзелю, — расказвае яна. — Я тады яшчэ не асабліва зразумела і спытала, з якой мэтай, у адказ было: "Ну-у-у, трэба там, на пло-о-ошчу". І дадала, што шукаюць чатырох чалавек, наўзамен дадуць выхадны ў любы з дзён. Грошай не прапаноўвалі.

Ад такой "прапановы" Вікторыя адмовілася.

— І тут панеслася: "Вы што, хочаце як ва Украіне? Хочаце вайну? Вось у вас цяпер ёсць праца? Так? А можа і не быць!" Я спакойна ёй растлумачыла, што заўсёды магу знайсці працу, гэта не праблема. У выніку яна мне сказала: "Вы тут занадта разумная". І я пайшла.
 

"Хачу пайсці, але баюся"

Ёсць сярод патэнцыйных удзельнікаў праўладнага мітынгу і па-сапраўднаму ідэйныя — яны ўжо рыхтуюцца да мерапрыемства і абмяркоўваюць дэталі ў сваіх чатах у "Тэлеграме".

— Добры дзень, хачу схадзіць на наш мітынг у нядзелю. Але знаёмая палохае, ці мала правакацыя будзе, каб сілавікам нарэшце па поўнай можна было дзейнічаць супраць адмарозкаў-апазіцыянераў. Гэтага ж дакладна не будзе? — задаўся раніцай у чаце "ЯмыБатька" пытаннем адзін з удзельнікаў.

Агітуюць у чаце прыхільнікаў улады на яшчэ адно буйное мерапрыемства: у суботу плануецца аўтапрабег па маршруце Мінск — Магілёў. Праўда, ахвотныя пакуль ніяк не даюць аб сабе знаць.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.