У Курапатах будаўнікі знішчылі лагер абаронцаў

На будаўніцтве каля Курапатаў адбылася бойка паміж будаўнікамі і абаронцамі мемарыялу. У выніку лагер абаронцаў быў знішчаны, саміх іх выгналі з будаўнічай пляцоўкі. Пра гэта ў каментары Еўрарадыё распавёў Барыс Гарэцкі, які быў сведкам падзеяў.

Гарэцкі: "Актывістаў вывесці змаглі з будаўнічай пляцоўкі. Крыху пабілі. Уладзіміру Яроменку нават руку разбілі да крыві. Выкінулі з тэрыторыі будаўнічага лагера намёт. На тэрыторыі лагера засталася толькі адна дзяўчына з бел-чырвона-белым сцягам — яе будаўнікі чамусьці вырашылі не кранаць".

Абаронцы Курапатаў засталіся каля будаўнічай пляцоўкі. Іх там каля дзясятка, будаўнікоў — удвая больш. Па словах Гарэцкага, актывісты чакаюць, што неабыякавыя да праблемы людзі прыйдуць да іх падтрымаць сёння ўвечары.

Нагадаем, што абаронцы Курапатаў пратэстуюць супраць будаўніцтва офіснага будынку.