Мітрапаліт Павел не будзе атрымліваць беларускі пашпарт, бо “дазволіў Лукашэнка”
Кіраўнік Беларускай праваслаўнай царквы мітрапаліт Павел не будзе атрымліваць беларускі пашпарт. Пра гэта ён паведаміў карэспандэнту Еўрарадыё падчас наведвання Палаты прадстаўнікоў, дзе сёння праходзіць сустрэча дэпутатаў старога і новага склікання.
Мітрапаліт адзначыў, што Аляксандр Лукашэнка дазволіў яму не атрымліваць беларускае грамадзянства, бо для расіяніна гэта не абавязкова.
22 верасня адбылася сустрэча кіраўніка Беларусі з Сінодам БПЦ, на якой было заяўлена, што святарамі павінны быць беларусы. Мітрапаліт Павел першы чалавек у БПЦ, якога прызначыла РПЦ. Пры гэтым у адпаведнасці з законам “Аб свабодзе сумлення ў рэлігійных арганізацыях” ён павінен прыняць беларускае грамадзянства.
Да служэння ў Беларусі мітрапаліт Павел прыступіў 25 снежня 2013 года. У пачатку 2014 года ён заяўляў, што гатовы стаць беларускімі грамадзянінам.
