Вы тут

Мінскія чыноўнікі лічаць, што мінакі могуць хадзіць скрозь дрэвы

Café de Paris пакінуў пешаходам па паўметра па баках ад рашотак. Але чыноўнікам норм.

Мінскія чыноўнікі лічаць, што мінакі могуць хадзіць скрозь дрэвы. Інакш складана зразумець адказ, які блогер і гарадскі актывіст Антон Матолька атрымаў на свой зварот аб велізарнай вулічнай тэрасе рэстарана Café de Paris на вуліцы Карла Маркса.

"Падчас абследавання выяўлена, што тэраса размяшчаецца на адлегласці 1,2 метра ад прыствольнай агароджы дрэва дыяметрам 0,35 метра, што ў сваю чаргу адступае ад праезнай часткі на 1,3 метра. Такім чынам, агульная адлегласць ад тэрасы да праезнай часткі вуліцы складае 2,9 метра", — сказана ў адказе.

1,2 м + 1,3 м = 2,5 м. Астатнія 40 см —  гэта тое самае дрэва, пра якое пішуць чыноўнікі!

Фрагмент адказу, атрыманага Антонам Матолька з адміністрацыі Ленінскага раёна Мінска

Кожны з пакінутых пешаходам праходаў па баках дрэва не дацягвае нават да 1,5 метраў. У той жа час, у красавіку 2018 года Мінкульт узгадніў тэрасу з умовай, што кіраўніцтва ўстановы пакіне мінакам не менш за 1,8 метра.

А вось вынікі замераў, якія рабіла Еўрарадыё
Ад краю тэрасы да рашотак — 57 см. І столькі ж з іншага боку.

Але адміністрацыю Ленінскага раёна Мінска гэта не вельмі-та хвалюе.

"...размяшчэнне летняй тэрасы рэстарана Café de Paris на пешаходнай частцы па вуліцы Карла Маркса, 8 забяспечвае праход па тратуары, хоць і стварае некаторыя нязручнасці для пешаходаў, можа функцыянаваць у існуючых габарытах", — робяць выснову чыноўнікі.