Мінадукацыі дазволіць выпускнікам, якіх выгналі за спісванне, пераздаць ЦЭ
![На экзамене](/sites/default/files/styles/gallery_main/public/2024-01/ce-2401.jpg.webp?itok=qbV-0iNL)
На экзамене / protutor.by
Выпускнікі 11-х класаў, якіх за парушэнні выдалілі з цэнтралізаванага экзамену (ЦЭ), сёлета ўлетку змогуць пераздаць экзамен. Пра гэта заявіў міністр адукацыі Андрэй Іванец. Гаворка ідзе пра выпускнікоў, якіх выгналі з экзамену за спісванне, выкарыстанне мабільных тэлефонаў ці іншыя парушэнні.
"Такія хлопцы і дзяўчаты змогуць здаць цэнтралізаваны экзамен 19 і 21 жніўня, летась яны маглі зрабіць гэта толькі праз год", — прыводзіць словы Іванца рэсурс Reform.by.
Але паступіць у ВНУ такія выпускнікі сёлета не змогуць — уступная кампанія ў вышэйшыя навучальныя ўстановы да часу паўторнай здачы ЦЭ скончыцца. У іх застанецца магчымасць падаць дакументы ў каледжы.
Нагадаем, цэнтралізаваны экзамен сёлета ў Беларусі пройдзе 27 і 30 траўня. Выпускнікі здадуць тэст па рускай або беларускай мовах, а таксама па прадмеце на выбар. Чакаецца, што сёлета ЦЭ будуць здаваць 55,4 тысяч чалавек. Гэта больш, чым летась.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.