Мінабароны заблакавала сайт з петыцыяй за адстаўку міністра абароны
І патрабуе ад тых, хто падпісаў дакумент, пацвердзіць свае дадзеныя. Маўляў, вядзецца кампанія па дыскрэдытацыі Узброеных сілаў.
Міністэрства абароны заблакавала сайт Zvarot.by, на якім збіралі подпісы за падрабязнае расследаванне інцыдэнту са смерцю салдата ў Печах і за адстаўку кіраўніка ведамства Андрэя Раўкова. На сайце Мінабароны з’явілася інфармацыя пра тое, што са Zvarot’а на пошту міністэрства паступіла вялікая колькасць паведамленняў з аднаго і таго ж электроннага адрасу з выкарыстаннем праграмнага забеспячэння для рассылкі спаму. Служба тэхнічнай падтрымкі, якая абслугоўвае Міністэрства абароны, паведаміла пра гэта ў глабальны сервіс барацьбы са спамам SpamCop.
“Аналіз зваротаў, якія паступілі з сайта zvarot.by на паштовы сервер Міністэрства абароны, паказаў, што былі пазначаныя неіснуючыя адрасы электроннай пошты адпраўніка і іх рэгістрацыйныя дадзеныя (прозвішча, імя, імя па бацьку і хатні адрас). Такім чынам, вакол гэтага здарэння на падставе домыслаў і чутак разгорнутая мэтанакіраваная кампанія па дыскрэдытацыі Узброеных сілаў”, — паведамляе прэс-служба Мінабароны.
На дадзены момант (14 кастрычніка, 15:45) Zvarot.by не адкрываецца.
Акрамя таго, людзі, якія падпісалі петыцыю, атрымалі на электронную пошту паведамленні з просьбай праверыць і пацвердзіць асабістыя звесткі, якія яны ўказалі:
Кампанія па зборы подпісаў за расследаванне інцыдэнту ў Печах і за адстаўку Андрэя Раўкова пачалася 11 кастрычніка і за першыя суткі сабрала 4 тысячы подпісаў. Сайт быў заблакаваны і потых зноў стаў даступны. Агулам сабрана амаль 9 тысяч подпісаў, але цяпер Zvarot.by заблакаваны паўторна.
Накіраваць свой зварот наўпрост у ведамства можна тут.