Мікалай Аўтуховіч на судзе заявіў пра пераслед з боку міліцыі
![Мікалай Аўтуховіч на судзе заявіў пра пераслед з боку міліцыі](/sites/default/files/styles/gallery_main/public/2023-08/autuch-1306-2.jpg.webp?itok=e1Gz9MS8)
Мікалай Аўтуховіч у сваіх паказаннях на судзе згадаў папярэднія судзімасці. Ён заявіў, што ні разу не парушаў закон, але міліцыянты "не адступалі ад мяне ні на крок ні на адно імгненне, ні ў адным кутку Беларусі". Ён назваў гэта пераследам, піша "СБ. Беларусь сегодня".
Аўтуховіч заявіў, што яго ўчынкамі і дзеяннямі рухаў пошук праўды і справядлівасці.
Як і некалькі дзён таму, ён зноў заявіў пра невінаватасць астатніх падсудных: "У гэтым абвінавачванні панапісвалі кучу трызнення, якое не стасуецца з маім характарам і паняццямі. Для чаго было "шыць" АЗГ (арганізаваная злачынная групоўка) гэтым людзям? Вось ён я: садзіце на колькі хочаце, але не рабіце злачынства супраць гэтых людзей".
Мікалая Аўтуховіча затрымалі ў снежні 2020 года. Разам з ім пад суд трапілі 11 чалавек. Іх вінавацяць у падпале дома міліцыянта ў Ваўкавыску, падрыве прыпаркаванай машыны сілавіка ў Гродне. Самога Аўтуховіча вінавацяць па 12 артыкулах крымінальнага кодэкса.
Суд над "групай Аўтуховіча" праходзіць у гродзенскай турме, таму на яго пускаюць толькі прадстаўнікоў дзяржаўных СМІ.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.