Мэр Львова пракаментаваў адмову купляць беларускія аўтобусы

Мэр Львова Андрэй Садавы пракаментаваў Еўрарадыё рашэнне горада адмяніць тэндар на закупку сотні беларускіх аўтобусаў.

— У такі няпросты час, як сёння ў свеце, вельмі важна падтрымліваць уласнага вытворцу. І хачу верыць, што краіна шмат зробіць крокаў [у гэтым кірунку. — Еўрарадыё]. Вельмі часта тэндарныя працэдуры еўрапейскіх інстытуцый не ўлічваюць вельмі многія нюансы. Таму мы адмянілі гэты тэндар. І я веру, што ў наступным тэндары пераможа ўкраінскі вытворца і будуць створаны дадатковыя працоўныя месцы і будзе больш падаткаў мясцоваму бюджэту.

На ўдакладняльнае пытанне аб тым, ці гэта было выключна эканамічнае  рашэнне, ці ўсё ж мае месца ўплыў палітыкі, мэр Львова адказаў так:

— Кожнае рашэнне мае вельмі шмат умоў... Калі б у Беларусі не было вось гэтага голага нерва, гэтай барацьбы — я не ведаю, як бы мы рэагавалі. Проста падзеі ў Беларусі, і вялікая пашана свабоднаму беларускаму народу, падштурхоўвае нас быць уважлівымі... я люблю Беларусь, я б вельмі хацеў, каб Украіна і Беларусь мелі выдатныя стасункі і будуць рабіць для гэтага ўсё магчымае і немагчымае.

Садавы заключыў: ён верыць, што складанасці ў стасунках дзвюх краін з'яўляюцца часовымі.