Мельянец змог выехаць з Беларусі разам з жонкай і 7 дзецьмі
![Сяргей Мельянец](/sites/default/files/styles/gallery_main/public/2024-04/415859842_6880203285410208_7851712183876474238_n.jpg.webp?itok=Qw5Dz_c9)
Сяргей Мельянец / facebook.com/melsergiy
Сяргей Мельянец змог выехаць з Беларусі разам з жонкай і 7 дзецьмі. Пра гэта ён напісаў у Facebook. Гэтай вясной хрысціянскі прапаведнік, паэт, выканаўца аўтарскай песні, шматдзетны бацька правёў 25 сутак на Акрэсціна.
"Раней, на пытанне “Як справы?" адказваў "Яшчэ жывы, яшчэ на волі". Цяпер сітуацыя змянілася — я ўжо на волі, — піша Мельянец. — Здарыўся цуд — па малітвах родных і сяброў мяне выпусцілі з турмы на Акрэсціна, дзе правёў 25 сутак. Прыйшлося тэрмінова з'язджаць з краіны...".
Сяргей Мельянец просіць у тых, у каго ёсць магчымасць, дапамагчы яго сям'і, якая апынулася на чужыне.
Мельянца затрымалі ў сакавіку ў Мінскім гарадскім судзе — ён прыйшоў на судовае пасяджэнне, каб малітоўна падтрымаць палітвязня Ігара Карнея. На яго склалі пратакол аб адміністрацыйным праваапарушэнні і асудзілі на 13 сутак арышту. Пасля дадалі яшчэ 12 сутак.
Тры гады таму Сяргея Мельянца судзілі за бел-чырвона-белыя жалюзі на акне і аштрафавалі. Летась ён удзельнічаў у пахаванні палітвязня Алеся Пушкіна.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.