МАРГ абавязаў крамы прадаваць больш беларускіх яблыкаў

Міністэрства антыманапольнага рэгулявання і гандлю змяніла пастанову аб асартыментных пераліках, абавязаўшы прадуктовыя крамы, супер- і гіпермаркеты прадаваць больш беларускіх яблыкаў. Адпаведнае рашэнне  апублікавана 12 кастрычніка на Нацыянальным прававым інтэрнэт-партале.

Раней у гандлёвай сеткі, у залежнасці ад памераў крамы, павінна было быць ад аднаго да трох найменняў беларускіх яблыкаў. Новая пастанова павялічыла гэтыя нормы удвая: ад двух да шасці найменняў.

У гэтым годзе ў Беларусі надзвычай вялікі ўраджай яблыкаў. Менавіта таму МАРГ і ўвёў гэтую часовую норму. У МАРГ падкрэсліваюць, што ніхто не абавяжа крамы прадаваць шэсць найменняў беларускіх яблыкаў не ў сезон — напрыклад, у чэрвені.

Разам з тым, міністэрства абяцае не ставіць цэнавыя бар'еры для імпартных яблыкаў на беларускім рынку.