Марчанка: без украінскага збожжа свету пагражае глабальная катастрофа
Свету пагражае глабальная харчовая катастрофа, калі Украіна не зможа правесці паспяховую пасяўную да пачатку траўня. Такую заяву зрабіў міністр фінансаў краіны Сяргей Марчанка.
"Украіна займае першае месца ў свеце па экспарце алею. Другое — па экспарце ячменю і рапсу. Трэцяе — па экспарце жыта. Украіна забяспечвае амаль 10% сусветных паставак збожжа. Паводле ацэнак экспертаў, 400 мільёнаў людзей у свеце залежаць ад паставак украінскага збожжа", — аргументаваў ён.
Украіна адчувае складанасці з пасяўной і ў заходніх рэгіёнах, дзе актыўных баявых дзеянняў няма. Па-першае, нестае рук, бо шмат хто вырашае пакінуць родныя мясціны, а мужчыны ідуць у войска ці тэрытарыяльную абарону. Па-другое, Расія мэтанакіравана бамбіць месцы з запасамі паліва.
